VLEN po shkon drejt formalizimit si parti me dy bashkëkryetarë dhe një kryesi të ngushtë prej pesë anëtarësh. Marrëveshja pritet të finalizohet javën e ardhshme, ndërsa liderët do të udhëtojnë në Kosovë.
Por pyetja reale nuk është kush do të ulet në karrige.
Pyetja është: çfarë po ndryshon për shqiptarët?
Modeli me dy bashkëkryetarë (Kasami–Mexhiti) paraqitet si “realitet i ri”. Por a është ky realitet politik apo vetëm rishpërndarje e pushtetit brenda një rrethi të ngushtë?
Alternativa kërkon rotacion. ASH është e fragmentuar. Fraksionet po shtohen.
Kjo nuk duket si unitet. Duket si negociatë për mbijetesë.
Nëse shtyllat janë vetëm Besa dhe LD, atëherë çfarë mbetet nga barazia që u premtua në fillim?
Nëse vendimet merren 4 me 1, a është ky konsensus apo formalitet?
VLEN thotë se si parti e vetme do të faktorizohet më fort në qeveri.
Por faktorizimi në qeveri nuk matet me poste.
Matet me rezultate konkrete për qytetarët.
Ndërkohë, terreni sheh tensione, rivalitete dhe përplasje të brendshme.
Në vend të konsolidimit, duket një garë për kontroll.
Nëse kjo është “riformatimi”, atëherë le ta themi hapur:
A po ndërtohet një strukturë e re politike apo thjesht po centralizohet pushteti në dy duar?
Sepse shqiptarët nuk votuan për dy bashkëkryetarë.
Votuan për ndryshim.
Dhe ndryshimi nuk matet me statut.
Matet me guxim për të ndarë pushtetin, jo për ta përqendruar.
